خطاب الرئيس بتاع كل يوم

خطاب رئيس جمهورية

أيها المواطنون
صباحكم لذيذ
يا أحلى معيز
تمأمأ ع الفاضي
اقفل بيوت
واتسبب ف موت
وآخرة ده كله
تلقى الشعب راضي
انا اليوم وقفت
وهزيت الطول
لحل المشاكل
وفك الحمول
عشان القضايا
بتاعة الرعايا
عشان تقولوا عني
ده راجل خجول
اولنا البطالة
يا سلة زبالة
ده انتوا ياما قلتوا
فيها قوالة
وقلتوا الشباب
ده حالته هباب
طب قولوا ليه
واذكروا الاسباب
آدي دكتور
وهو اصلا طور
وخريج جديد
وتايهه الحلول
ما يفتح له فرن
يبيع فيه عيش
ويسلك اموره
بكام حتة حشيش
ماهو الشعب كله
دماغه ميه ميه
هايكسب دهب
ويدعي لي اعيش
تانينا الرغيف
وقال ايه خفيف
ما عادش بخيره
ولا عاد نضيف
ده شغل ضغائن
ده حتى في الريف
بيأكلوه للبط
في الشتا والصيف
وبصوا على البط
تلاقوه في صحة
بينزل الترعة
ولا عنده كحة
ولا ضهره واجعه
ولا ف صوته بحه
وقال انا السبب
طب ياخي "تيت"
تالتنا المساكن
لاحلى شباب
صباحنا عنب
نهارنا عناب
ده انا خايف عليكم
م العيشة الهباب
اللي انا عايش فيها
مع ماما "رباب"
الجواز ده غم
وتدمير للبدن
واللي هايتجوز
ف السجن يتسجن
لازم توفروا
صحتكم وعافيتكم
عشان كلنا نحب
ونخدم الوطن
تالتنا الكوسة
جاتوه وبسبوسة
بيرشوا بيها
ضعاف النفوس
طب ده فلان صديقي
بلده فيها رشوة
وناس مرتشية
تديكم دروس
مافيش ع الارض بلد
ما فيهاش فساد
بدال ما تشتكوني
اشكوا لرب العباد
وادعوا على كل الظلمة
والناس المفترية
اللي بتاخد رشاوي
وناسية يوم الميعاد
انا مش عارف ليه
ما تكبروش دماغكم
كل حاجه اقولها
دايما تاخدوها جد
كل يوم نجتمع
من اجل سعادتكم
ولا بنلاقي حلول
ولا حد فاهم حد

ختامكم سلام
وخلص الكلام
ولو هاتعوزوني
تلاقوني في الاحلام

يا لهوي هتودينا في داهييه الحيطان ليها ودان هنروح في خبر كان

هههههههههههههههههههههههههههههة
طيب طفى الولعة وخبى الحشيش
مشكور على المرور

ربنا يحميك لشبابك شكلك كده مش ناوى تجيبها البر أبدا ياااااااااااااااااااااااااااااا مصطفى هههههههههههههههههههه

سبها على الله يا وليد